Kandidatura ba Sekjer Fretilin Rogerio: “Hau Nunka Koalia ba Publiku”

.
Josefa Parada - Tersa, 22 Fevereiru 2011 - SUARA TIMOR LOROSAE

DILI - Nasaun foun Timor Leste, besik atu tama ba festa bo’ot demokrasia ka elisoens jeral. Partidu barak komesa fa’an ona sira nia programa iha baze inklui re-estrutura sira nia partidu. Partidu hotu-hotu komesa halo konsolidasaun husi nivel nasional to’o suku sira.

Tendensia ne’e mos mosu iha Partidu Fretilin nia laran. Tuir informasaun, Eis Minsitru Interior, Rogerio Tiago Lobato mos sei kandiata a’an ba Sekretariu Jeral Partidu Fretilin. Hatan ba kestaun ne’e, Rogerio hateten, nia rasik nunka fo sai ba publiku katak atu kandidata a’an ba pozisaun ida ne’e. Ne’e duni, nia labele fo komentariu ruma kona ba asuntu ne’e.

“Hau nunka koalia konaba buat ida ne’e, planu ka la planu ne’e iha partidu laran maka ami diskute. Hau la bele koalia buat sira ne’e ho imi,” dehan Rogerio hafoin halao inkontru ho Prezidenti Republika Jose Ramos Horta, iha Palacio Prezidenti Nicolau Lobato, Segunda (21/02).

Nia hatutan, konaba atu hili Sekretariu Jeral iha Partidu Fretilin, nia rasik orgulhu ho prosesu nomos programa partidu nian, tamba hanesan nasaun foun, TL hatudu duni nudar nasaun demokratiku.

“Hau senti katak primeira vez iha Asia, partidu ida hanesan Fretilin hakarak halo elisoens direita ba nia Prezidenti no Sekretariu Jeral, ne’e buat diak ida ba demokrasia,” nia dehan.

Tuir Rogerio, atu konkore ba pozisaun ne’e, nia rasik seidauk bele fo komentariu. Buat hirak ne’e sei diskute iha partidu laran, hafoin maka bele fo sai ba publiku, liu husi media.

Hatan ba objectivu saida maka nia hasoru Prezidente Horta, Rogerio hateten, nia hasoru Prezidenti tamba sira belun diak, nomos sei iha relasaun familia. “Ne’e hau nia kompadre, hau nia aman nia oan sarani, tamba sa maka ami labele hasoru malu?” Rogerio fo razaun ba jornalista sira.

Antes ne’e, Diretor Yayasan HAK, Rui Viana fo nia komentariu ba involvimentu Rogerio Lobato nian iha partidu Fretilin. Nia hateten katak iha partidu ida, konforme sira atu hili se’e maka bele sai sira nia lideransa diak, maibe tenki hare mos ba background husi lideransa sira ne’e.

“Ne’e internal partidu nian, maibe tenki hare mos ba lideransa ne’ebe atu lidera ne’e nia background, atu nune’e povu bele iha konfiansa nafatin,” Rui fo hanoin.

Husi parte CNRT nian, Deputadu Aderito Hugo da Costa hateten, konsolidasaun partidu sira nian, hahu tiha ona iha elisoens jeral 2007, no
kontinua iha tinan hirak tuir mai, iha nivel distritu, sub-distritu, suku no aldeia.

Nia hatutan, konsolidasaun lao diak, ho intensaun laos deit hare ba eleisaun jeral, mais kaderizasaun ne’ebe halo hanesan partidu politiku ida tenki prepara nia kader iha aldeias, sukus, sub-distritu to’o distritu, hodi bele kompete iha kualker eventu eleisaun ba munisipiu no eleisaun jeral ninian.

Nune’e Presidente CNE, Faustino Cardoso hateten konaba kampanha, iha lei elisaun nian ne’ebe koalia konaba saida maka partidu bele intende iha kampanha eleitoral.

Nia haktuir, CNE akompanha no hatene katak termu ne’ebe maka partidus politiku sira uza laos kampanha, maibe konsolidasaun estrutura partidu ninian.

“Demokrasia ne’e laiha sentidu, wanhira laiha partidus politikus no ita nia konstituisaun asegura multi partidarismu ka partidu barak bele moris iha nasaun ida ne’e, no atu asegura sira nia prezensa iha prosesu eleisaun, sira tenki halo konsiladasaun,” Faustino esplika. Par
.