“Tuku Ha'at Dader Deit Polisia Mai Duni Sai Ami Husi Uma”

.

Written by Thomas Sanches - CJITL - Friday, 21 January 2011

Dili Flash, Relasiona ho rai estadu nian ne’ebe mak povu okupa iha Bairo Pite liu-liu iha Bairo BRIMOB, Kinta feira horseik (20/01) tuku 04:00 Oras Timor Leste, Polisia Nasiona Timor Leste - PNTL lubuk ida ba duni no obriga povu iha bairo refere hodi sai husi fatin ne’eba tanba estadu atu uja rai ne’e.

“Ami mos la hatene derepenti deit dadersan tuku 04:00 polisia Task Force uja forsa hodi duni ami sai husi fatin ne’eba ami laos ulun to'os maibe se kuandu ami sai entaun ami atu ba hela iha ne’ebe sedangkan estadu seidauk perpara fatin ida ba ami” dehan Antonia Lopes da Cruz ne’ebe hela iha bairo BRIMOB iha parlamentu nasional, kinta (20/01).

Nia hatutan katak, ho deit osan $2000 ne’ebe governu fo ne’e la to’o atu hari uma ida.

Governu fo deit osan $2000 ne’e vale saida depois uza tan forsa ba duni deit ami iha ami nia uma laran entaun ami atu ba hela iha ne’ebe tanba agora ne’e tempu udan.

Nune’e mos Madalena da Costa husu ba governu atu fo tan tempo ba sira hodi buka fatin hodi hela, tamba agora fatin ba sira atu hela laiha.

“Ami sei mai hela iha parlamentu nia oin se governu hasai ami uja forsa deit no ami laos lao rai kuitadu ita Timor oan sai atan no bainaka ba nia rai rasik maibe ema hosi nasaun seluk mak hetan fatin diak iha ita nia rai no sosa rai bot hodi loke perusahan maibe ita Timor oan rasik osan laiha governu duni tun sai deit”. (Thomas Sanches/CJITL)
.