TINAN NE'E LAIHA PAGAMENTU BA IDP'S

.

Josefa Parada - Kinta, 20 Janeiru 2011 - SUARA TIMOR LOROSAE

DILI – Ministra Sosial Solidaridade (MSS), Domingas Fernandes Alves ‘Micato’ deklara katak, governu hapara total pagamentu ba IDP’s sira iha tinan ne’e. Tanba sei fo prioridade ba ameasa hamlaha iha rai laran.

Maske nune’e, la taka dalan katak tinan oin sei bele selu tan IDP’s sira ne’ebé seidauk hetan pagamentu.

Governu katak Micato iha anu fiskal nee seidauk bele fo nia direitu bele hatoo keixa ba Prokuradoria Jeral Republika hodi justifika lolos ema sira ne’e hafoin haruka nia prosesu ba MSS atu halo pagamentu iha tinan oin mai.

“Ema ne’ebé seidauk simu sira bele hatoo iha prokuradoria jeral hafoin hare katak los duni tinan oin bele hare orsamentu. Maibe, tinan ne’e laiha alokasaun orsamentu ba IDP’s,” dehan MSS Micato.

Atende Hamlaha

Tuir previzaun MSS nian katak tinan nee sei mosu hamlaha relasiona ho mudansa klimatika iha rai laran. Governu oras prepara ona fo’os tonelada 1.000-resin hodi responde situasaun nee. Maibe, ba distribuisaun governu sei hare orsamentu nebe aprova hodi distribui foos ba area nebe identifika ona hamlaha.

Nune’e, governu mos prepara ona nia ema sira iha baze atu rekoila dadus ba sira ne’ebé sofre hamlaha tanba afeta husi mudansa klimatika. “Sira ne’ebé ami identifika hamlaha tanba dezastre naturais mak sei simu ajuda husi governu. Nune’e, tinan kotuk mos ami halo ba grupu vulneravel sira,” tenik MSS.

Distritu balun tuir Micato hatudu ona sinal hamlaha. Maibe Ministeriu Sosial Solidaridade seidauk foti desizaun tamba seidauk simu keixa. dz
.