DEPUTADU MATEUS DE JESUS MAK HAMATE POVO NIA MORIS

.

ILA MATE TANBA DEPUTADU MATEUS DE JESUS

BY BERELIKU AILARAN

Komik! Durante debate orsamentu Deputadu Mateus de Jesus, ex-deputadu PUN, ameasa dehan se mak "vota kontra OJE2011 siknifika katak hamate povo nia moris" (sita iha Antonio Ramos nia blog Forum Haksesuk, tekstu bele hare iha kraik).

Se ita hanoin didiak, uluk kuandu Deputadu Mateus de Jesus foin sai deputadu ho PUN, nia sae hela motor tuan ida hodi tun sae Dili Bobonaro. Eis-katekista ne mos hatudu an hanesan ema ho prinsipiu bot. Kuandu AMP propoin fahe PAJERO ho aumenta salariu ba deputadu sira, Deputadu Mateus de Jesus mos kontra makas dehan duni "ida ne sei hamate povu nia moris"! Maibe ne tamba orsamentu ba PAJERO ne sai isuisu deit.

Maibe kuandu orsamentu ba PAJERO ne aprova tiha ona, Deputadu Mateus de Jeusus foti kedas nia liman hodi simu ninia PAJERO. Eis katekista be uluk sae motor HONDA tuan ne agora hakarak deit PAJERO, maiske nia tenki abandona ninia partidu nebe lori nia ba kadeira iha PN.

PAJERO foun ida kusta hira? Multiplika PAJERO ne ba 65 sai osan hira? Depois keta haluhan ho KKN ituan hasai persen ba kolega, single source, ba sst., sai los osan hira? Depois sei tama tan salariu ba Deputadu Mateus de Jesus nia kondutor, mina ba kareta, reben metan, manutensaun (ka manu oan tensaun), depois multiplika ida ne ba deputadu sira nebe simu PAJERO. Sai los hira? Dolar US Juta 10? Juta 20?

Foin daudauk labarik feto oan ida ho tinan 9, nia naran Ila, mate tan deit GOVERNU AMP la tau matan. Labarik oan ne pursija deit halo tratamentu ida para nia bele moris. Tratamentu ne kusta hira? Dolar US juta 1? Karik la to. PAJERO ida nia folin? Ne mos la to karik? Tan sa mak labarik feto oan ne mate? Tanba deputadu sira hanesan Mateus de Jesus, tan ne mak labarik feto oan ne mate. Deputadu sira hanesan Mateus de Jesus prefere gasta osan estadu nian atu hadia sira nia moris rasik duke hare povu nia moris. Sira duni mak HAMATE POVU NIA MORIS! Osan be atu uja halo tratamentu ba Ila mak hodi sosa tiha Deputadu Mateus de Jesus nia PAJERO! Ila mate, Deputadu Mateus de Jesus goza ho PAJERO. Keta hakfodak, iha foho neba, dok husi Deputadu Mateus de Jesus ho ninia PAJERO, labarik sira hanesan Ila sei barak. Sira hotu-hotu laiha serteza ba sira nia moris bainhira sira heta moras ruma. Enkuantu Deputadu Mateus de Jesus sa'e ninia PAJERO tun sae, labarik sira hanesan Ila moris iha perigu nia laran. Dezde Deputadu Mateus de Jesus tama PN hodi simu ninia PAJERO ho salariu nebe as, labarik hanesan Ila nain hira ona mak mate? Se mak hamate sira nia moris? Se mak hamate povu nia moris? Deputadu Mateus de Jesus mak hamate sira nia moris. Deputadu Mateus de Jesus mak hamate povu nia moris!

Hakarak hadia povu nia moris? Iha eleisaun 2012 hasai Deputadu Mateus de Jesus husi Parlamentu. Se mak vota ba Deputadu Mateus de Jesus iha 2012, nia hamate povu nia moris!!!

OJE2011 Fretilin kontra, se maka kontra hamate povo nia moris

Dili. Forum Haksesuk (FH). Iha haksesuk malu jeneralidade konaba Orsamentu Jeral Estadu (OJE) 2011, Partidu Fretilin iha Parlamentu Nasional (PN) vota kontra. OJE2011 aprovadu iha jeneralidade ho votus favor husi AMP, PUN no PPT (43), kontra Fretilin 21 no Abstensaun KOTA 1, husi 65 deputadus ne´ebe representa povu Timor-Leste.

Iha deklarasaun ba votu wainhira hatene ona rezultadu votasaun, deputadu Mateus de Jesus, dehan katak, ”vota favor ba OJE2011, tamba fiar katak sei lori mudansas ba povu nia moris”. Hatutan Mateus, ex-deputadu PUN dehan, ”vota kontra OJE2011 siknifika katak hamate povo nia moris”. Iha fatin, Deputada Fernanda Borges, deklara katak: ”vota favor ba OJE2011 tamba fundus necesario duni ba desenvolvimentu ba nasaun Timor-Leste”.

PD liu husi deklarasaun politika, ”Hafoin rona no hare, analiza no tetu, tuir konseitu, kontiudu no strutura, proposta Orsamentu tinan 2011, maka Bancada Partido Democratico, konklui katak, programa no orsamentu tinan 2011, mosu atu halo reajustamentu vizaun politika, strategia no tatika ba prosesu kaer ukun no bandu, iha estadu foun ida ne’e. Reajustamentu ne’e, halo ho objetivu atu restaura povu nia fiar ba valor ukun rasik an, no ba kredibilidade estadu Timor Leste. Reajustamentu ne’e mosu atu hatur povu nia esperansa, ba progresu sosial no politiku, nomos ba dezenvolvimentu ekonomiku iha ita nia rai. Reajustamentu ida ne’e, mos mosu atu dignifika estado Timor Leste, nudar estado de direitu demokratiku”.

Primeiro Ministro iha ninia lian taka, la haluha ”hodi agradece ba participasaun husi bankada hotu-hotu iha debates loron 3 nia laran, hatudu katak ita nia demokrasia iha duni qualidade, kompara ho rai seluk ne´ebe historia hanesan ita no liu husi procesu hanesan”, defende PM Kay Rala Xanana Gusmao.
.