Deputadu Lamenta, “Polisia Les Reben Kareta Deputadu”

.

Pedro Belo

Jornal Nacional Diário - Tersa, 11 Janeiro 2011

Dili-“Deputadu Riak Leman ho Francisco de Araujo lamenta ho atuasaun Policia tranzitu Distritu Aileu ne’ebe pasa revista ba kareta no motor sira, hodi les reben kareta deputadu nian, maibe Ministru sira nia husik livre.

“Atuasaun Policia Distritu Aileu lalos, tamba iha lei deputadu sira livre tranzitu, maibe iha dia 30 dezembru hau liu husi neba sira para tiha hau nia kareta i sira les tiha reben ne’ebe iha kareta,”afirma deputadu Riak Leman ba Jornalista sira, Segunda (10/1) iha Parlamentu Nasional.

Akontesementu ne’e akontese iha festa Natal no tinan foun ne’e, tuir deputadu Riak, iha ne’eba, nia koalia kedan ho Policia, sera ke ida ne’e orientasaun ba nivel nasional ka ou ba fatin oan ida deit.

“Hau hanoin situasaun ida hanesan ne’e ladiak, tamba se orientasaun anivel nasional fo sai iha televizaun no fo avizu ruma iha fatin ruma para ita hatene, dehan katak kareta hotu ne’ebe iha reben ne’e tenki les tiha,”dehan Riak Leman.

Nia koalia, Ministru sira nia kareta liu ba liu mai, sira la halo revista, tamba saida mak deputadu sira nia kareta sira revista no les sai reben.

Deputadu Riak haktuir, tuir lolos PN ne’e nudar instituisaun ida, se atu les kareta nia vidru no atu revista buat ruma, tenki fo hatene iha instituisaun ida ne’e i liliu Prezidente PN, depois Parlamentu aviza fali iha plenaria para deputadu sira hotu-hotu ida-idak bele les tiha reben ne’e, agora ida ne’e derepenti deit.

OPORTUNIDADE HANESAN DEPUTADU, Francisco de Araujo husi Bancada ASDT koalia, iha dia 6 foin lalais sira tun, iha akontesementu ida iha Aileu, nia rasik ho Policia sira halo diskusaun oituha iha ne’eba, tamba sira les reben ne’ebe iha nia kareta.

“Hau hare sira les deit maka reben kareta sira ne’ebe deputadu sira uza, membru governu lae, tamba saida, ho razaun ida ne’e mak ami la konkorda,”dehan deputadu Francisco.

Nia mos konsidera, policia sira ne’ebe les reben kareta deputadu sira nian ne’e indisplina i sira ejerse sira nia funsaun ne’e laiha ekelibradu.

“Hau hare kareta trek no Mikrolet balun iha Aileu sira la les reben, maibe kareta sira husi Suai, Same sira les, ne’e sira nia funsaun ne’e saida, i ida fali mak sira nia atuasaun ba deit komunidade no membru Parlamentu Nasional sira, maibe ministru sira la atua, ida ne’e hau senti la dun diak, tamba ne’e hau husu ba komodante jeral atu hare situasaun ne’e,”deputadu Francisco kestiaona.

Entertantu Jornalista ne’e tenta konfirma ona situasaun ne’e liu husi viatelefonhe ba policia liu husi Komodante Policia Distritu Dili, Pedro Belo, maibe nia parte rasik seidauk hatene informesaun ne’e i nia tenta konfirma kestaun ne’e, hafoin sira husi Policia fo komentariu.das
.