PJR IDENTIFIKA KAZU TRAFIKU HUMANU

.
Segunda, 13 Dezembru 2010 - Josefa Parada - SUARA TIMOR LOROSAE

DILI-Prokuradoria Jeral Republika, Anna Pessoa Pinto, informa katak, ninia parte identifika ona ema no grupu balun ne’ebe halao atividade trafiku humanu no oras ne’e dadaun iha hela prosesu investigasaun nia laran.

PJR Anna dehan, trafiku humanu sai hanesan kestaun bo’ot ne’ebe komponente estadu tomak presiza preokupa. Anna dehan, Ministeriu Publiku (MP) tau mos ninia atensaun maka’as ba problema ne’e tanba TL iha reziaun ida ne’e perigu ba trafiku humanu, droga, prostitusaun no atividade illegal sira seluk.

“Iha tiha ona. Ami rona tiha ona kazu ida konaba Trafiku Humanu, ne’e mak investigasaun lao hela,” informa PJR ne’e ba jornalista sira hafoin halao inkontru semenal ho Prezidente Republika, DR. Jose Ramos Horta, Segunda, (13/12), iha Gabinete PR, Aitarak Laran-Dili.

Nia hatutan, iha sinais balun ne’ebe hatudu katak kazu illegal barak mak hahu mosu iha Timor Leste. Tan ne’e, Anna husu ba komponente tomak atu fo informasaun ba MP wainhira rona ka hare atividade illegal sira iha TL. PJR ne’e dehan, wainhira ninia parte simu informasaun no karik iha mos evidensia, sei kontinua halo investigasaun klean, maibe se la iha informasaun no dadus ruma, ninia parte labele halo buat ida.

“Hau husu mos tulun ba media atu fo hatene ba ita nia maluk sira katak wainhira sira iha koinesementu ruma (konaba trafiku humanu) mai fo informasaun ba Prokurador Jeral,” katak nia.

PJR ne’e agradese mos ba informasaun balun iha media ne’ebe ajuda teb-tebes prosesu investigasaun ne’ebe ninia parte halo. Jorgino Santos
.