FALSIFIKASAUN DADUS IDOZOS, " MSS HETAN NOTIFIKASAUN HUSI TRIBUNAL "

.

Maria Domingas Fernandes Alves

Timor Post - Kinta 02 Dezembru 2010

Dili-Ministeriu Solidaridade no social hetan ona karta notifikasaun husi Tribunal Rekursu Kona-ba falsifikasaun dokumentus ferik no katuas sira nian,”informa Ministra Maria Domingas Fernandes Alves, horsehik iha Parlamentu nasional.

“Simu ha duni karta notifikasaun husi Tribunal Rekursu ne’e kona ba deklarasaun ba ami nia rasik ne’ebe dehan katak dadus ne’ebe ami presiza hadia,”katak Mikato hafoin audensia ho deputadu sira husi komisaun C,”dadus ferik no katuas sira nia ne’ebe hetan falsifikasaun ida ne’e mak deloit halo informasaun ba tribunal rekursu atu fo fali rekomendasaun iha Parlamento Nasional katak tenke hadia”.

Ministra ne’e hatutan, preokupasaun MSS hato’o iha konselhu Ministru iha loron 28 Febreru 2010, nune’e desizaun mak membru governu hotu halo re-verifikasaun ba dadus katuas no ferik sira nian, Husi ne’e, MSS hetan duni katak dadus balun laloos,”Haktuir Mikato Alves.

Husi dadus ne’ebe la loos, nia dehan, ba oin MSS sei hadia sistema pagamento ba idozus nomos veteranus sira.

Nia informa, prioridade pagamentu tinan ne’e no tinan oin mai bolsa da mae, idozos, veteranus nomos dezastre naturais, maibe pagamentu ne’ebe MSS la-halo ona mak, pagamentu kona ba tratamentu ho IDPs.

Mikato esplika tan dehan, asistensias sociais MSS kontinua maibe laos ona transferensia hanesan asistensia social ba instituisaun ne’ebe kopera iha area defisensia no reinsersaun social hare ba instituisaun sira ne’ebe proteje labarik no atu implementa lei violensia domestika nomos organizasaun ne’ebe hare ba joventude. Ezekusaun OJE 2010 nian, MSS konsege ejekuta ona 78%.

Entertantu Prezidente Komisaun C Manuel Tilman hateten, MSS tenke halo back up fali dadus ne’ebe mak durante ne’e sira rekilha ona, liliu ba pagamentu ba idozus nune’e labele iha falsifikasaun.(imelda mota)
.