ELETRISIDADE KONTINUA LAKAN MATE, PN LAKON KONFIANSA BA GOVERNU

.
Timor Post - Kuarta 15 Dezembru 2010

Dili-“Parlamentu Nasional (PN) sente lakon konfiansa ba governu liliu ministeriu infraestrutura relasiona ho problema eletrisidade ne’ebe to’o ohin loron seidauk resolve.

“Parlamentu Nasional kada tinan sempre aprova osan maibe la hatudu realidade entaun lakon konfiansa, no esperansa ba governu ne’ebe jere prosesu ne’e,”tenik xefi bancada PD (partidu Demokratiku) Adriano do Nascimento ba Jornalista sira iha PN, Tersa, (14/12).

Xefe Bancada PD ne’e dehan problema eletrisidade akontese kleur ona maibe governu rasik la resolve problema ne’e.

“Durante tinan 3 AMP ukun laiha solusaun ba problema refere, ne’eduni lalika dun malu maibe parte rua EDTL no governu mak tenki responde,”katak Adriano.

“Ne’e hatudu inkapasidade governu, nunka halo povu kontenti, halo lakon konfiansa tantu ami,”reforsa nia.

Arão Noe

Iha fatin hanesan vice Presidente Komisaun G ne’ebe trata asuntu infraestrutura no ekipamentu social deputadu Arão Noe de Jesus hatete problema ne’ebe mak durante ne’e infrenta maka kualidade jerador iha EDTL ne’ebe kuaze tuan hotu, no manutensaun ne’ebe sempre atraza.

“Ezemplu EDTL husu atu manutensaun hatama iha fulan marsu atu halo antisipa hodi tama Junhu tenke halo ona manutensaun ba jerador sira maibe realidade ne’ebe mak akontese prosesu refere sempre atraza maske pedidu hotu atama iha governu,”deklara nia.

Nia dehan sujestaun EDTL sempre hato’o ba governu liu husi proposta maibe sempre failha iha ezekusaun ne’ebe dada prosesu no impaktu ba jerador.

Tan ne’e deputadu CNRT ne’e dehan Ministeriu Infraestrutura (MI) ni Ministeriu Finansas (MF), tenki fo atensaun ba pontu importante husi rekomendasaun ne’ebe EDTL aprezenta.

Realidade ne’e akontese duni tanba rekomendasaun komisaun G nian mos halo rekomendasaun maibe realidade ne’ebe governu responde maka sempre atraza entaun impaktu ne’e ba fali jerador,”dehan nia.

Deputadu CNRT akresenta katak failansu ne’e akontese durante tinan 3 ona, katak failansu ne’e iha governu ne’ebe la atende nesesidade teknika ne’ebe servisu iha EDTL.

“Tan ne’e salah iha governu li-liu Ministru Infraestrutura laos tekniku iha EDTL,”deklara Arao.

Inacio Moreira

Entertantu deputadu Inacio Moreira husi Bancada FRETILIN hatete problema eletrisidade ne’e kompleksu tebes.

“Realidade maka governu ne’e laiha vontade atu resolve problema eletrisidade nian,”dehan nia.

Nia dehan tan ptoblema barak mak akontese iha EDTL laran ne’ebe governu la konsege resolve.

“Durante tinan 3 aloka orsamentu barak atu hadia no sosa jerador foun maibe realidade ne’ebe maka akontese ba sosa fali jerador ne’ebe uzadu entaun halo eletrisidade labele lakan normal,”nia sublinha.

Problema hirak ne’e hotu membru komisaun G ne’e dehan tekniku operasional EDTL halo proposta ba MI liliu SEEAU maibe la fo importansia atu responde.

“Maibe obriga fali tekniku sira iha EDTL atu servisu loron kalan, atu hadia jerador ne’ebe ho kondisaun la diak,”lamenta Inacio.

SEEAU nia hakarak tau deit osan maibe la importansia nia jestaun atu servisu lao diak.

Ne’eduni deputadu FRETILIN dehan pedidu ne’e la’os deit husi EDTL no komisaun G maibe husi jestor Kompanya Manitoba rasik ne’ebe husu atu haumenta tan kapasidade 30 MW ba jerador.

Maibe governu kontinua la fo importansia maske kestaun ne’e interese nasional ne’ebe povu hotu iha direitu atu asesu.

“Ne’e hatudu ona katak, povu liliu nia reprezetante iha PN lakon konfiansa ba governu,”deklara nia.

Nia dehan tan problema laos deit ba eletrisidade maibe kuaze dezenvolvimentu ne’ebe povu hakarak la realize.(agus dos santos)
.