Aniversariu Tinan Ida Elementu PNTL Tiru Valdir Iha Delta Nova

.

Kuka

Written by CJITL - Wednesday, 29 December 2010

CJITL flash, Quarta feira ohin, loron 29 Dezembru 2010, liu tinan ida jovem Valdir Cesar do Nascimento Lebre Correia, hetan tiru ho kilat musan iha Salaun Delta Nova iha tempu festa dansa nia laran, to'o ikus i'is kotu iha Hospital Sentral Guido Valadares, kaju ne’e rasik levanta makas iha parlamentu nasional husi bankada FRETILIN durante tinan tomak, maske nune’e seidauk iha rejultado final konaba autor ne’ebe kondenadu tuir lei.

Tuir mai ne’e, nota komunikadu ne’ebe redasaun CJITL simu husi bankada FRETILIN konaba aniversariu tinan ida element Polisia Nasional Timor Lorosa’e - PNTL tiru Valdir Cesar do Nascimento Lebre Correia iha salaun delta nova.

“Maske tempu naruk tebes liu ona, to'o oin loron seidauk iha sinal mai hosi autoridade seguransa Estadu nian nebe'e kaer Lei no Ordem hanesan PNTL atu hatudu autor ba krime ida ne'e, hodi halakon konfiansa no ekspetativa bo'ot sociedade Timor Leste tomak nebe'e hamro'ok ba justisa nebe'e la iha” hateten komunikadu ne’ebe haruka husi deputado FRETILIN, Francisco Miranda Branco.

“Komisaun nebe'e hari'i hodi simu knar atu investiga akontesimentu traziku ida ne'e sai abortadu tia, tanba to'o oin loron seidauk hatudu avansu signifikativu atu bele lori autor krime ba hata'an iha Tribunal, ida ne'e bele hatudu momo'os tentativa ruma atu subar faktus no evidensias hodi lori impunidade ba autor aktu krime nebe'e kondenavel, nebe'e halo iha faze prosesu sociedade tomak Timor Leste mehi no hakarak moris iha hakmatek no paz nia laran” komunikadu ne’e hateten.

Miranda Branco iha komunikadu laran hatutan liu tan; Bankada Parlamentar FRETILIN nebe'e iha tempu primeiru kedas hamri'ik hodi defende justisa ba sira neb'e la iha kbi'it, no ho baze iha nia prinsipiu atu defende lia lo'os no justisa hanesan ba ema hotu iha sociedade demokratiku no estadu direitu nebe'e Timor Leste kaer tuir Konstituisaun Republika haruka, ejiji nafatin atu autoridade kompetente no komisaun nebe'e hetan knar atu investiga kazu tragiku ida ne'e, bele hatudu vontade politika no seriedade atu koopera ho sektor justisa hodi lori autor krime ba hata'an iha Tribunal.

Fenomenu sira nebe'e akontese iha tempu sira ikus ne'e hatudu agentes balu PNTL halao knar la tuir ona prinsipiu nebe'e ita nia Konstituisaun Republika haruka no lalaok sira ne'e hatudu ita nia polisia laos ona parseiru povu nian nebe'e hakbesik ba povu, maibe'e hatudu hahalok sira nebe'e halo ita nia polisia sai hado'ok a'an liu tan hosi povu.

Maske nune'e Bankada Parlamentar FRETILIN enkoraja ita hotu tenki esforsa a'an atu ajuda hadia ita nia instituisaun polisia atu kaer metin ita nia Konstituisaun Republika no tuir prinsipiu demokratiku nebe'e ita komunga.

“Nune'e bele lori hikas konfiansa povu no sociedade Timor Leste tomak ba ita nia instituisaun estadu hanesan PNTL nebe'e kaer Lei no Ordem no ita nia sistema justisa iha Republika Demokratika de Timor Leste” Hakerek Komunikadu ne’e hodi remata. (*/CJITL)
.