" AMI SELU $2000 BA TVTL "

.
Written by Domingos Dasilva/CJITL - Wednesday, 01 December 2010

CJITL flash, Fontes konfidensial ida ne’ebe servisu iha gabinete Ministeriu Turismo Comercio no Industria – MTCI, Terca feira ne’e ba reporter CJITL konfirma katak transmisaun direita ba konsertu muzika GOD BLESS domingo kalan iha palasio governu ne’ebe transmite direitamente husi Televisao Timor Leste – TVTL ne’e selu ho kustu $2000.

“Ba transmisaun direita, Domingo kalan, loron proklamasaun 28 Novembru ne;e, Ami selu TVTL $2000 ba sira, ne’e sira mak husu” hateten fontes ne’ebe husu atu CJITL labele publika nia identidade ne’e.

Konsertu muzika GOD BLESS ne’ebe hetan transmisaun direita husi TVTL, maske nune’e bainhira Ahmad Albar, vokalista banda muzika ne’e kanta muzika bad ala ne’en (6) akontece failhansu tekniku iha TVTL, ne’ebe halo komunidade la akompanha konsertu ne’e kuaze minute lima resin.

“Ami selu karun tiha mak, TVTL failhansu tekniku hela deit, ba future TVTL tenki tau atensaun ba buat sira ne’e” Fontes ne’e hatutan.

Iha parte seluk, Santino Dare Matias, hanesan hare nain TVTL ne’ebe mos asiste konsertu muzika ne’e husi TVTL hateten katak, nia senti la satistas no satiadu ho servisu TVTL nian ne’ebe sempre mosu failhansu tekniku bebeik ba eventu bo’ot sira.

“TVTL ne’e empreza publiku, tinan tinan parlamentu aprova osan ba sira, maibe sira kontinua husu osan ba instituisaun governu ne’ebe organiza iventu hanesan nee, depois transmisaun mos failha hela deit” Santino hateten.

To’o noticia ne’e hatun, CJITL nia reporter tenta hela atu halo konfirmasaun ekipa TVTL konaba asuntu ne’e. (Domingos da Silva/CJITL)
.