Secjen FRETILIN, Dr. Marí Alkatiri:" Ukun An Seidauk Kompletu Povu Sei Moris Kiak no Mukit "

.
TVTL, Segunda kalan 29 Novembru 2010

Tim Kobertura TVTL

CCF Dili-Sekretariu Jeral Partidu FRETILIN Dr. Marí Alkatiri hateten, maske Timor Leste komemora loron Indepedensia ba 35 maibe “Ukun Rasik An” seidauk kumpletu tamba Povu kontinua moris iha mukit no kiak nia laran.

Partidu FRETILIN Domingo (28/11) foin lalais ne’e komemora Proklamasaun Unilateral Indepedensia Timor Leste ba 35 iha Comite Central da FRETILIN (CCF), Dili ho tema “Hanoin Klean no Afirma Hikas ba Loron Nasional Indepedensia ne’ebé proklama iha tinan 35 ba kotuk” ba tinan ida ne’e selebrasaun loron 28 de Novembru hahu ho minutu da silensia hodi fo menajen ba heroi ne’ebe mate durante luta ba libertasaun, hananu no mos poizia ne’ebé aprezenta husi militantes Partidus FRETILIN.

Sekretariu Jeral Partidu FRETILIN, Dr. Marí Alkatiri hateten “Ukun Rasik An” seidauk kompletu tamba povu barak oras ne’e sei moris iha kiak no mukit nia laran ho ekonomia ne’ebé minimu.

Intervensau Sekjen, Dr. Marí Alkatiri

Uluk FRETILIN dehan “Mate ka Moris Ukun Rasik An” e agora Timor Leste “Ukun Rasik An” ona, maibe Ukun Rasik An ne’e seidauk kompletu tamba FRETILIN mos hateten katak; “Libertar Patria e Libertar Povu”, Patria ita Libertar ona mas povu seidauk, Povu sei kiak nafatin, povu sei mukit nafatin, Povu sei hare fa’an sasan barak ba povu, ne’e mak hau dehan; faze ida agora, faze ida atu hametin paz, hametin estabilidade para atu hala’o dezenvolvimentu, para povu Maubere Buibere hotu-hotu iha rai ida ne’e tenki benefisiu ba indepedensia ida ne’e.

Tim Kobertura TVTL

Sekretariu Jeral Partidu FRETILIN realsa liu tan katak; maske proklamasaun unilateral indepedensia deklara husi lideransa Partidu FRETILIN, maibe la’os signifika Proklamasaun Indepedensia ida ne’e ba Partidu FRETILIN nia mesak deit maibe ba povu tomak, tamba ne’e jerasaun Partidu FRETILIN ne’ebé sei moris tenki kontinua hodi valorija ba “Matri da Patria” sira.

Intervensaun Sekjen FRETILIN Dr. Marí Alkatiri

Katak FRETILIN la Proklama Indepedensia ba FRETILIN deit, maibe FRETILIN Proklama Indepedensia Ba Povu no Nasaun Timor Leste, ne’e akontese iha tinan 35 liu ba, tempu naruk ona, tinan-tinan ita komemora loron importante ida ne’e, e buat ida historiku importante, hau mos hanoin tinan ida ne’e nasaun tomak, estadu tomak, komesa ona senti katak; se ohin ita “Ukun Rasik An” tamba iha 1975, iha ema lubun oan ida mak bolu naran Comite Central da FRETILIN (CCF) foti desizaun hodi proklama Indepedensia para atu mobilize no organiza povu tomak atu ezisti i defende indepedensia ida ne’e, ita mos hanoin ba kotuk katak; maluk sira barak maka mate no fo sira nia vida para ohin it abele hatutan tan prosesu ida ne’e, se sira la fo sira nia vida karik? Ohin ita labele halo proklamasaun Indepedensia iha momentu ida ne’e, tamba ida ne’e ita nunka halua maluk sira, maibe ita hanoin ba kotuk para ita tenki hatene hateke ba oin, hateke ba oin signifika atu dezenvolve rai ida ne’e, hatu hametin paz, atu hametin estabilidade ba rai no Povu Timor Leste.

Tim Kobertura TVTL

Antes atu remata komemorasaun loron Indepedensia Bilateral ba Timor Leste iha tinan 35, Presidente Partidu FRETILIN Francisco Luolo ho Sekretariu Jeral Partidu FRETILIN Dr. Marí Alkatiri intrega sertifikadu rekuinesementu ba simpazitante Partidu FRETILIN. Tim kobertura TVTL.
.