Konstruksaun Sentral Eletrika, SEEAU Propoin Milaun U$166 ba 2011

. Foto - La'o hamutuk

Josefa Parada - Kinta, 25 Novembru 2010 - SUARA TIMOR LOROSAE

DILI- Sekretaria Estadu Eletrisidade Agua no Urbanizasaun (SEEAU) propoin milaun U$166 ba kriasaun sentral eletrika husi oliu pezadu ba tinan fiskal 2011.

Orsamentu kontinuasaun ba sentral eletrika tama iha kategoria kapital dezenvolvimentu proposta Orsamentu Jeral Estadu ba 2011 ho total milaun U$405,9.

SEEAU Janurio Pereira ba STL hateten, planu aumentu orsamentu ne’e tanba konstruksaun sentral eletrika hanesan planu multi annual (multiyear) hahu husi 2008 no sei remata iha fin 2011.

“ Konstruksaun eletrika to’o agora gasta ona milaun U$600 la sura ho proposta ba 2011 nian,” komenta SEEAU Januario hafoin partisipa seminariu husi Komisaun G Parlamentu Nasional kona ba oinsa hari’I Estrada ida tuir padraun kualidade.

Konstruksaun sentral eletrika hala’o husi kompania China Nuklear ho dezenhu tekniku kontrata espesialista husi Italiano. Konstruksaun rasik tama ona ba faze monta tower ka airin eletrisidade iha distritu Hera tama to’o Manatuto, no tuir planu sei monta iha Teritoriu tomak ho total rihun 2 resin. Sentral ba eletrika mos sei monta iha fatin rua, Hera no Betanu.

Maske nune’e Komisaun G asuntu infrastrutura Parlamentu Nasional kestiona makas ba kinerja servisu kompania ne’ebe konsidera tarde demais. “ Kompania ne’e ladun ativu atu duni deadline.

Konstruksaun ne’e neneik liu tanba kompania falta ekipamentus no rekursu humanus,” dehan Prezidente Komisaun G Pedro da Costa ba STL foin lalais.

Tuir observasaun STL iha sentral konstruksaun Hera, realmente prosesu konstruksaun lao neneik duni tanba ekipamentus pezadu ladun sufisiente atu alkansa lalais konstruksaun ne’e, hodi fo impaktu besik ona fin Dezembru, Tower foin monta tama ba Manatuto.

Maske nune’e, kompania mos hetan defikuldade kona ba rai bainhira atu monta tower iha distritu balun. Prosesu monta Tower ne’e rasik presija rai ho naruk metro hat ba rai kuak no luan metro 8. Eurozia Almeida
.