"Iha Dili Ne'e, Ami Mos Fa'an Fos MTCI Ne'e Atu Buka Manan"

.

Foto, CJITL

Written by Pedro Delfim/CJITL - Saturday, 27 November 2010

CJITL Flash, Maske governu liu husi Ministeriu Turismo Comercio e Industria (MTCI) hapara ona fos MTCI maibe fos ne’e rasik agora sei namkari iha Estrada ninin e mosu tan fos ho marka oin-oin deit.

Tuir Manuel Maia ne’ebe fa’an fos MTCI iha dalan ninin iha sidade Dili, hateten katak ami fa’an fos MTCI ne’e laos ami sosa husi armazen maibe ami sosa husi loza deit.

“Ami fa’a fos ne’e tuir presu ne’ebe ami sosa iha loza, ami sosa ho U$17,50 cent entaun ami fa’an fali ho U$ 18 Dollar atu nune ami mos bele manan netik oituan, ami laos fa’an tuir ami nia hakarak”dehan Manuel iha Mercadu Comoro Sexta (26/11).

Iha fatin hanesan, konsumedora Carmelita do Santos katak governu hapara ona fos ho marka MTCI maibe fos ne’e rasik kontinua nakonu iha Estrada ninin.

“Governu dehan hapara ona fos MTCI maibe fos ne’e agora kontinua nakonu iha Estrada ninin e povu iha area rural kontinua halerik ho fos, nusa mak governu lakoi lori fos ne’ebe agora nakonu iha Dili laran para lori ba povu iha area rural ne’e”dehan Carmelita iha nia Mercadu Comoro.

Antes ne’e, fulan Outubro liu ba, Ministru Gil Alves foti ona desizaun hodi hapara distribuisaun fos MTCI iha kapital Dili, tanba konsidera populasaun iha sidade Dili iha kapasidade atu sosa fos seluk, nune’e fos MTCI nian so bele distribui deit ba distritu 12 sira seluk. (Pedro Delfim/CJITL)
.