GOVERNU TENKI RESPONSABILIZA BÁ PROMESSA " TINAN INFRAESTRUTURA"

.

Timor Post Kuarta, 10 Novembru 2010

Dili-Membru Parlamentu Nasionál husu governu atu responsabliza bá nia planu ne’ebé hatete iha orsamentu Jerál Estadu 2010 katak kontinua tau prioridade hodi investe iha infraestrutura no rekursu umanu.

“Dezde Governu AMP ukun, sira mai koa’lia iha ne’e dehan tinan “infraestrutura no infraestrutura” maibe la halo buat ida,”dehan deputadu bancda FRETILIN Inacio Moreira bá Timor Post iha Parlamentu Nasionál, Tersa, (09/11), relasiona ho infraestrutura ne’ebé seidauk la’o masimu.

Nia konsidera governu nia kapasidade laiha duni tanba tinan tolu ukun maibe to’o ohin loron buat ida la akontese, tanba ne’e, tuir nia, AMP atu aloka osan hira mos buat hotu sei la lao tanba Ministru barak mak laiha responsablidade.

“Lalika aloka orsamentu boot demais hodi gasta la tuir nia dalan tanba se tau osan boot mos sei gasta no repete fali deit saida mak sira promete tiha ona iha tinan kotuk katak tinan infraestrutura maibe realidade laiha vice Prezidente komisaun G PN ba assuntu Infraestrutura ne’e realsa.

IHA FATIN HANESAN DEPUTADU BANCADA CNRT, Pedro da Costa Martires informa TL nuudar nasaun foun tenki investe osan ba infraestrutura no rekursu umanu hanesan prioridade ba governu atu bele desenvolve nasaun.

Nia dehan rekursu umanu no infraestrutura bazika maka ponte importante atu bele dada investimentu seluk iha futuru hodi TL bele hetan returnu ida ne’ebé di’ak no sustentavel ba nasaun.

Pedro rekonese katak ba tinan hirak liu ba kotuk governu tau ona preoridade ba infraestrutura no rekursu umanu maibe lakensege bele rejolve, tuir Prezidente Komisaun G ne’e katak nasaun foun TL tenki hasoru erru sira ne’ebe dala barak halo opozisaun ho governu sempre kritika malu.

Pedro haklaken importante maka governu tenki estuda husi erru hirak ne’e hodi hadia diak liu tan projeitu sira iha futuru, nia mos sujere atu governu hadia sistema suprevizaun atu nune’e bele kontrolu didiak projetu sira ne’e hodi labele repete tan erru pasadu nian.

ANTES NE’E MINISTRA FINANSAS, Emilia Pires hateten orsamentu geral estadu (OJE) ba tinan 2011 governu sei tau prioridade nafatin ba infraestrutura no kapasitasaun rekursu umanu.

“Iha tinan 2011, ita sei hakiak fundu rua especial fundu ida ba infraestrutura no fundu ba rekursu umanu,”tenik Emilia Pires.

Labele Hato’o Propaganda Polítika

Alinde ne’e, Diretor ONG Luta Hamutuk (LH) Mericio Akara hatete deklarasaun governu AMP ba tinan infraestrutura laos buat foun akontese, baibain tiha ona, Maibe, tuir nia, Povu hakarak realidade.

“Ita rona Governu fakar osan barak ba infraestrutura iha tinan hirak nia laran ona maibe kestaun mak públiku sira kestiaona preokupa tanba laiha realidade,”katak Mericio ba TP iha nia knar fatin, Tersa (09/11).

Nia haktuir realidade indika katak Estrada, bee mos husi nasionál to’o area rurais laiha mudansa, estarda kuak ba bebeik, ponte kotu ba bebeik no valeta la halo.

Signifika dezenvolvimentu ba komunidade sira husi capital to’o base atu hetan bee mos laiha, tanba ne’e, povu lori ain la’o kilometru 2 ka 3 mak hetan bee mos no eletrisidade mos lakan la normal. (manuel/julião)
.