" LABELE IMPATA REZOLUSAUN PN "

.

Timor Post - Kinta, 28 Outobru 2010 - EDITORIAL

Dili-Parlamentu Nasionál iha foin lalais liu bá aprova ona rezolusaun ida atu halo auditoria externa bá Ministériu Infraestrutura espesialmente Sekretariu Estadu Eletrisidade Agua Saneamentu no Urbanizasaun (SEEAU) no jestaun eletrisidade durante tinan tolu (2007-2010) inklui halo auditoria bá prosesu aprovizionamentu kompras jeradór bá sentral EDTL no auditoria bá prosesu aprovizionamentu ezekusaun obras konstrusaun sentrál elétrika foun ho liña ba trabsmisaun no supervizaun.

Liu husi sesaun plenária, Tersa (26/10), Prezidente Parlamentu Nasionál Fernando Lasama fó ona lampu azul katak sei públika rezolusaun ne’e iha tempu badak no haruka kopia bá governu para atu halo auditoria externa bá problema refere.

Buat ne’ebé ita hatene katak iha preamblu husi rezolusaun ne’e hakerek katak governu liu-liu Minitériu Infraestrutura ho nia SEEAU laiha kapasidade total iha kontestu ezekuta orsamentu estadu, ne’e hatudu katak Parlamentu (bancada, governu no opozisaun) la fiar ona (mosi tidak percaya) bá Ministru Infraestrutura Pedro Lay atu lidera Ministériu Infraestrutura no Sekretáriu estadu Januario Pereira atu lidera SEEAU.

Simu ka la simu, ne’e maka membru parlamentu nasionál nia pozisaun, maibé, pozisaun ne’e seidauk serteza loos, atu di’ak liu ne’e, hein to’ok rejultadu husi auditoria ne’ebé governu sei halo, auditoria maka sei tatoli lia loos, atu hetan lia loos, ekipa auditoria tenki hamriik hanesan indepedenti, labele inklina.

Iha parte ida, ita mós dúvida, bá ekipa auditoria ne’e, karik ekipa auditoria ne’e mai husi governu, ka mai husi instituisaun seluk, it abele garante iha imparsiál ka neutro oituan. Kuandu mai husi Governu, posiblidade bá neutru ne’e ki’ik liu, tamba membru governu ho membru governu maka investiga malu, wainhira membru governu ho membru governu maka investiga malu fali, otomátikamente sei akontese konflitu interese.

Hanesan na’in bá moto “Na’uk 5 cent, sai!!!!”, Primeiru Ministru Xanana Gusmão tenki iha seriedade hodi implementa rezolusaun ne’e, labele impata rezolusaun ne’e tanba de’it ema ne’ebe atu hetan auditoria ne’e mai husi AMP ka mai husi partidu ida ho Primeiru Ministru.(*)
.