KAZU KORUPSAUN LABELE SAI RELATÓRIO DEIT, TENKI LORI TO'O TRIBUNAL

.

Written by Lety - Monday, 18 October 2010 14:10

CRC Online, Direitur Ezekutivu LABEH Christopher Henry Samson husu atu kazu barak ne’ebé halo ona investigasaun hodi rekomenda tiha ona ba orgaun kompetente labele sai hanesan relatóriu deit,tenki lori to’o Tribunal.

Tanba realtoriu nebe Provedoria de Direitos Humanos e Justiça (PDHJ intrega tiha ona ba Parlamentu Nasional iha fulan Juñu liu ba iha duni kazu kona-ba korupsaun barak tebes.

“Iha keixa ne’ebé PDHJ halo ona investigasaun hodi rekomenda ba orgaun sira ne’ebé kompetente atu kontinua halo investigasaun hodi halo julgamentu iha Tribunal,” dehan nia iha nia kna’ar fatin.

Kazu sira ne’e mak hanesan kazu alegasaun fraude/korupsaun iha tezouro iha Ministeiru Finansas atu foti medidas ba funsionáriu “payroll” ne’ebé mak halo failansu, presiza hadia sistema pagamentu ba salariu funsionáriu, kazu kona-ba alegasaun prátika mal administrasaun, abuzu podér no tráfiku influensa ba prosesu fa’an ai kameli iha Ministeriu Agrikultura, kazu indikasaun korupsaun iha Sekratariadu Tékniku Administrasaun Eleitóral (STAE) mak funsionáriu sira ne’ebé halo prátika mal administrasun no husu ba Ministeriu estatal atu foti medidas disiplinar hasoru funsionáriu sira.

“Iha mos kazu barak teb-tebes ne’ebé mosu hanesan alegasaun korupsaun iha orsamentu Estadu ba projetu sosa aimoruk,reagents no ekipamentu médiku iha SAMES, tinan 2007/2008 ne’ebé mosu iha Ministeriu Saúde, kazu violasaun direitus humanus ne’ebé membru PNTL sira halo inklui kazu Ministeiru Justisa ne’ebé PDHJ halo ona investigasaun no presiza lori to’o iha Tribunal”, nia haktuir.

Tanba ne’e, LABEH husu ba parlamentu nasional ne’ebé simu ona relatóriu PDHJ nian atu bolu lalais Procuradoria Geral da República (PGR) hodi husu informasaun kona-ba kazu sira refere ninia prosesu to’o ona iha ne’ebé ? saida mak halo tiha ona? Saida mak presiza atu halo? Hodi nune’e kazu sira ne’e bele hetan ninia finalidade.

“Ami husu ba Procuradoria katak kazu sira iha indikasaun krime ne’ebé rekomenda ba Ministeriu Publiku, PGR tenki halo investigasaun profundu hodi haruka ba Tribunal para bele foti desizaun,” nia husu.(Lety)
.