FULAN 6 ONA KAK " IMPOTENT "

.

Adérito Soares de Jesus entre os corruptos

Suara Timor Lorosae - Segunda, 04 Outubru 2010

DILI – Molok estabelese Komisaun Anti Korupsaun (KAK), publiku hahu tau esperansa bo’ot atu halo netik buat ruma hodi bele halakon no hatudu faktus ba akuzasaun korupsaun ne’ebe ema barak hakilar durante ne’e.

Iha fulan Abril 2010, hafoin simu naran kandidatu ba Komisariu KAK husi Governu, Parlamentu Nasional, liu husi eleisaun sekretu eleze Aderito de Jesus Soares sai Komisariu KAK. Iha semana hirak tuir mai, Komisariu KAK Aderito hili no fo pose ba ninia Adjuntu nain 2, Manuel Bucar no Jose Neves.

Maske organizasaun balun pesimista ba figura hirak ne’ebe lidera KAK, maibe iha mos institusaun lubuk ida mak hahu fiar katak KAK sei konsege halo buat ruma hodi kombate Korupsaun, Koluizaun no Nepotismu iha TL. Maibe, hafoin loron 100 funsiona, KAK ladauk hatudu rezultadu ruma.

Komisariu fo deit razaun katak presiza hametin lai estrutura molok bo’ok kazu ruma. Komisariu Aderito dehan KAK sei fokus ba rekrutamentu estaf hodi haforsa ninia estrutura. Nia mos promete atu sei hahu book kazu ruma iha fulan Setembru nia laran.

Publiku hahu lakon konfiansa ituan ba KAK, maibe kontinua espera katak iha fulan hirak oin mai KAK bele halo netik buat ruma.

Realidade, besik fulan 6 ona, Komisaun ne’ebe PN harii atu Kombate KKN iha rai ida ne’e ladauk halo asaun ruma.

Direitur ONG Lalenok ba Ema Hotu (LABEH), Cristopher Henry Samson hateten, maske to’o oras ne’e KAK sei dauk bele halo asaun ruma, maibe pelumenus KAK tenki aprezenta ona ba publiku sira nia planu nasional kombate korupsaun bazeia ba lei estabelesementu KAK.

“Iha fulan 6 nia laran wainhira la konsege book kazu ruma, lolos KAK tenke aprezenta ona ninia planu nasional luta hasoru korupsaun,” afirma Cristopher ba STL iha ninia knar fatin, horseik.

Nia dehan, Planu Nasional Kombate Korupsaun ne’e importante atu nune’e kada intidade iha nasaun ne’e bele hatene ida-idak ninia papel iha luta kontra korupsaun.

Cristopher dehan, planu ne’e atu defini involvimentu husi povu, igreza, sosiadade sivil, governu, judisiariu, media no seluk tan.

“Se konsege defini ona ita bele dehan katak kombate korupsaun bele sai hanesan movimentu nasional,” hatete Cristopher.

Cristopher hatutan, molok KAK hamrik, ninia parte fo apoiu masimu tanba fiar katak atu kombate KKN iha rai laran tenki iha institusaun independenti ida ne’ebe hare espesial ba asuntu KKN. Maibe, nia lamenta tebes, wainhira KAK hamrik to’o ohin loron seidauk hatudu rezultadu ruma.

Tuir nia, durante ne’e Komisariu KAK halo deit promesa no la konsege realiza hodi halakon espiritu povu hodi fo suporta atu harii KAK.

“Wainhira fo promesa ba povu maibe la realiza sei fo impaktu negativu ba KAK,” dehan Direitur ONG LABEH ne’e. Nia lamenta mos ba KAK ne’ebe izola an husi media hodi la fo informasaun ruma ba atividade ka planu hirak ne’ebe ninia parte halo ona durante ne’e.

“KAK rasik promete kada fulan 3 sei hasoru media hodi fo sai informasaun ba povu, maibe ami hein to’o agora la iha,” nia kestiona.

Cristopher dehan, KAK labele taka an ba media, institusaun ida hanesan KAK tenki nakloke.

Nia parte husu ba KAK atu hahu ona halo buat ruma, nune’e bele hetan konfiansa husi povu.

Iha fatin ketak estudante Universidade ida, Domingos Araujo hatete, lolos KAK tenki halo asaun ruma atu bele hatudu ba publiku katak KAK hamrik atu kombate duni KKN.

“Hau senti KAK ne’e harii atu kombate korupsaun maibe ita lahare no rona liu sira nia atividade,” katak Domingos.

Estudante ne’e dehan, iha kazu barak ne’ebe lolos la presiza hein to’o buat hotu perfeitu mak bele bo’ok.

Wainhira STL tenta halo konfirmasaun ho Komisariu Anti-Korupsaun Aderito de Jesus Soares, maibe la konsege tanba Komisariu ne’e sei iha estranjeiru. gin
.