LUCIA LOBATO " TERSANGKA" BA KAJU MATERNUS

.

Lucia Lobato Hafoin Presta Deklarasaun iha MP, foto CJITL

Written by CJITL Editor-Friday, 09 July 2010

Dili Flash, Kinta feira (8/7) semana ne’e, Lucia Brandão Lobato, Ministra Justica oficialmente hetan notifikasaun husi Ministeriu Publiku (MP) sai hanesan arguida ou tersangka tanba deskonfia involve fo liberdade ba eis komandante milisia husi grupu Laksaur, Maternus Bere.

Ho notifikasaun ne’e MJ Lucia Lobato, kinta ne’e akompanha ho nia advogado Sergio Hornay ba presta deklarasaun kona ba involvimetu ninian fo liberdade ba Maternus Bere iha 30 de Agustu 2009 liu ba.

Iha prosesu presta deklarasaun ne’e ministra Lucia mos tenke kumpri dever judisiariu hodi responde pergunta lubun ida kona ba ninia involvimentu ne’e.

Lucia Lobato hafoin presta deklarasaun ba Ministeriu Publiku, ba jornalista hateten katak la’os nia mak fo, maibe desijaun mai husi Prezidete da Republika (PR) Jose Ramos Horta, tanba Horta promote nanis ona ba Jakarta katak antes 30 de Agustu 2009, Maternus Bere bele intrega ona ba guvernu Indonezia.

“Hanesan ukun nain ne’ebe fo moss liberdade ba Maternus Bere, hau toma responsabilidade ba hau nian, maibe ukun nain seluk mos tenke toma responsabilidade,” afirma Lucia.

“Hau mos husu ona ba MP bele rona mos deklarasaun husi PR Horta, PM Xanana no mos PGR, tanba hotu-hotu involvevidu, mas ikus mai MJ mesak mak hatan, ne’e la justu,” tenik Lucia.

Lucia Lobato rasik simu karta notifikasaun iha loron 22 junhu 2010 hodi notifika nia sai hanesan arguida ba kazu liberta Maternus Bere husi prizaun Becora.

“Hau hakarak hateten akuzasaun dehan hau hasai Maternus Bere husi kadeia, hau la simu, tanba ema hotu maka involve,” afirma Lobato.

Iha parte seluk, Sergio Hornai hanesan defeza ba MJ Lucai Lobato konfirma katak prosesu ida ne’e altu nivel labele fase liman, maibe ida ne’e interese ema hotu tenke responsabilija labele nia kliente deit. (CJITL Editor)
.