IDP'S CONSIDERA GOVERNU BOSOK TEN

.

Foto, CJITL

Written by Madalena Horta and CJITL Internship Bobonaro-Thursday, 01 July 2010

CJITL flash, Internal Displace Person (IDP) husi krize 2006 ne'ebe to'o oras ne'e seidauk simu orsamentu rekoperasaun, konsidera kuartu governu konstitusional ne’ebe lidera husi Primeiru Ministru Jose Alexandre Xanana Gusmão bosok ona sira.

Alberto Fernandes Lopes (49) nudar IDP’s iha Dare katak kleur ona simu resivu husi governu maibe to’o agora seidauk simu osan duit metan ida husi governu.

“Estadu fo hela surat tahan file ida ba ami desde uluk kedas ami nunka hetan buat ruma”, dehan Alberto soin lalais ne’e iha Dili. “Dader ami mai iha ne’e sira dehan ba iha Banku loron-loron ami sempre ba mai hela deit ami hanesan sira nia Bola tebe ba mai deit”.

Nia ameasa karik governu liu-liu Ministeriu Solidariedade Sosial la fo atensaun seriu ba sira problema ne’ebe iha maka sira sei halo asaun pasifiku hasoru Prezidenti no Primeiru Ministru.

Nune’e mos Joana de Deus (42) katak durante tinan tolu ona trata nia dokumentus no lor-loron ba mai edifisiu MSS no Banku maibe nunka simu nia osan.

“Ami ba mai hela deit sosial ho Banku maibe dezultadu la iha, boot sira halo ami terus ba nafatin”, tenik nia. “Hau hanoin ema ne’ebe servisu iha ne’eba la iha kapasidade atu atende povo nia nesesidade tanba ami mai bebeik sira dehan ema servisu sai hotu tiha ona no ami staf iha ne’e tama foun no la hatene buat ida”.

IDP seluk, Maria Estrella de Jesus (37) nudar IDP’s iha Hera mos sorte hanesan ho nia maluk nain rua ne’ebe to’o agora seidauk simu nia osan maske simu ona resivu husi governu.

“Hau seidauk simu, hau hanoin osan ne’e sira haruka ona ba iha banku, hau ba Chek sira dehan naran seidauk tama”, nia esplika.

“Durante tinan rua nia laran hau ba chek hela deit maibe laiha rezultadu”.

Ba preoukupasaun hirak ne’e, Ministra Solidaridade Sosial, Maria Domingas Alves dehan buat hotu tenki liu husi Prosesu wainhira atu hetan buat ruma tanba ne’e labele koalia deik deit atu halo asaun.

“Husu ba maluk sira ne’ebe halo asaun atu hakmatek lai tanba buat hotu-hotu tenki hein sira ne’ebe liu husi IDP’s no tenki hein tanba ema barak “, dehan ministra ne’e. (Madalena, Prisca/CJITL)

.