Prezidente Fotografer Timor Leste: Sulan PNTL Ba Komarka

.

Susana Cardoso, foto ist

Written by Emilia Ana and CJITL internship-Friday, 18 June 2010

CJITL Flash, Asaun membru Polisia Nasional Timor Leste – PNTL husi Task Force hasoru jornalista Diario Nasional, João Guterres da Silva iha Palasiu du Guvernu nia oin, hafoin jogu Portugal Vs Costa de Marfim, hetan kritika makas husi Autoridade media Timor Leste, hanesan Timor Leste Press Club – TLPC, Centru Jornalista Investigativu Timor Leste – CJITL no Timor Leste Photographer Association – TiLPA, tuir mai ne’e intervista reporter CJITL ho Prezidente Fotografer Timor Leste, Suzana Cardoso.

CJITL: Nu’udar Prezidente ba TiLPA saida mak ita boot sente wainhira jornalista ida hala’o hela nia knar liu – liu hasai fotografia depois hetan baku husi membru PNTL?
SC: Ida ne’e atetude at tebes husi PNTL, sa tan sira ema ne’ebe hatene lei, ema ne’ebe kompriende kona ba servisu jornalizmu husi parte hotu-hotu, lolos sira maka atu fo seguransa ba servisu ida ne’e, hau husu ba Komandante tenki fo sansaun maka’as ba atetude ida ne’e.

CJITL: Karik polisia sira presija atu hasa’e tan sira nia konhesimentu kona ba servisu media nian?
SC : Polisia sira presija hetan Trinamentu barak liu tan hodi kapasita sira nia an kona ba servisu jornalista nian, labele kapasita deit ho fiziku maibe presija mos kapasita sira nia intelektual. Hau mos husu ba parte kompetente atu ba oin mos suspeitu ne’e tenki hetan asaun makas, labele halo deit investigasaun hafoin para, bila perluh jornalista sira mos halo kondenasaun maka’as, halo asaun ida hasoru polisia, tanba ida ne’e la’os foin primeira ves sira baku jornalista, ita nia nasaun ne’e demokrasia, tanba saida maka demokrasia la iha liberdade ba imprensa.

CJITL: Saida mak ita boot sira liu-liu Asosiasaun atu halo hasoru PNTL?
SC: Hau hanoin katak Asosiasaun sira sei halibur hamutuk hodi haruka karta ida ba komandante PNTL atu foti medidas maka’as hasoru oknum polisia ne’ebe baku jornalista.

CJITL: Oinsa tuir ita boot nia hanoin kona ba asaun ne’e, diretur CJITL husu atu PNTL tenki husu deskulpa ba media lokal, apakah husu deskulpa ne’e bele ona rejolve problema?
SC : Hau hanoin deskulpa deit sei la rezolve problema, tenki halo investigasaun ida bazeia ba lei, tanba lei maka bele forma katak baku ema ne’e krimi, ita tenki foti asaun ida hasoru hahalok PNTL nian, bila perluh sulan tiha ba komarka, la’os para atu husu deit deskulpa, deskulpa sei la to’o, ita tenki fo tindakan maka’as ba komandante, sa tan ba ema ne’ebe kria lei maka viola uluk, se lae maka hahalok sira hanesan ne’e sei akontese nafatin deit. (Reporter Emilia, Adriana & Simeão/CJITL)
.