“Gil Alves Tenki Hapara Manipulasaun Husi Emprezariu Sira”

.

Foto CJITL

Written by Thomas Sanches-Friday, 04 June 2010

CJITL Flash -NGO Nasional, Lalenok Ba Ema Hotu (LABEH) iha Segunda feira semana ne’e (31/5) halo konsultasaun hamutuk ho Xefe Suku sira iha Distritu Bobonaro laran tomak konaba problema importasaun fos MTCI ne’ebe durante ne’e sai hanesan problema bo’ot ida ba povu iha area rural.

“Objetivu LABEH nian mai iha ne’e atu koalia ho autoridade local sira no buka solusaun ba problema importasaun fos MTCI no atu hatene tamba sa fos MTCI ne’e nia folin liu tiha fali presu ne’ebe governu determina” dehan Directur LABEH, Christopher Henry Samson, Segunda, (31/05), iha salaun enkontru Administrasaun Distritu Maliana.

Nia mos hatutan katak, problema ne’e balu mosu hosi autoridade lokal sira tanba lori povu nia osan ba sosa fos MTCI iha Dili ba fa’an fali iha fatin seluk.

“Dalaruma iha xefe suku balun sosa fos maibe lori la to’o iha ninia suku rasik ne’e tamba saida maibe realidade katak xefe suku balu asina duni akordu ida katak atu lori fos ba to’o iha sira nia suku rasik” dehan Christopher.

Hatan konaba problema ne’e iha fatin hanesan, Xefe suku Odomau, Antonio de Jesus hateten katak, iha sefe suku balu la konsege lori fos to’o sira nia suku rasik tamba problema tranporte.

“Ami la konsege lori fos MTCI to’o ami nia suku rasik tamba transporte mak laiha, dalaruma kareta sira ne’ebe tula fos mai ne’e to’o iha kota deit no ami haruka atu lori ba to’o ami nia suku kondutor sira dehan ami tenke selu foin sira lori ba” dehan Antonio de Jesus.

Antonio mos hatutan katak, nia rasik la hatene transporte sira ne’ebe tula fos ba distritu ne’e MTCI selu ka lae.

Nune’e mos ho Antonio Santa Cruz ne’ebe hanesan sefe suku Holsa dehan katak, governu liliu MTCI tenke hadia nia sistema distribusaun fos MTCI ne’e.

“Husu ba MTCI ne’ebe lidera hosi Gil Alves atu hadia mekanismu distribusaun fos MTCI hodi nune’e lalika mosu manipulasaun tamba iha emprejariu barak mak to’o agora sei sosa fos no lori ba fa’an ho presu ne’ebe as liu fali presu ne’ebe governu determina” Antonio hatutan. (Thomas Sanches/CJITL)
.