Governu Sei Harí Tan,Forum Nasional Prevensaun Korupsaun

.
TIMOR EXPOSE-Monday,May 24th,2010

Dili-Atu reforsa instituisoens Estadu nian ba luta kontra korupsaun, Governu liu husi Vice Primeiru Ministru (VPM) mak trata ba assuntu Gestaun no Administrasaun Estadu, lideradu Eng. Mario Viegas Carrascalão sei harí tan Forum Nasional Prevensaun Korupsaun (FNPK).

Objektivu harí FNPK ne’e atu reforsa instituisaun Estadu ne’ebe oras ne’e estabelese ona ba luta kontra korupsaun, hanesan Prokuradoria Geral Republika (PGR), Polisia Investigasaun, Inspeksaun Geral Estadu (IGS), Komisaun Anti Korupsaun (KAK).

Atu hetan formatu ba harí FNPK ne’e, Segunda (24/05), iha salaun Delta Nova, Comoro-Dili, VPM Carrascalão halao diskusaun ho entidades ne’ebe sei involve mos iha FNPK ne’e, hanesan reprejentante povu iha Parlamentu Nasional, Administrador Distritus, Sosiedade Sivil no Igreija.

VPM Carrascalão iha nia diskursu esklarese, FNPK ne’ebe nia rasik mak inisia ne’e harí bazeia ba rejolusaun No. 11/2010. Ke loke odamatan ba VPM atu buka meius ba reforsa instituisaun Estadu ne’ebe iha, liu husi partisipasaun ema hotu nian.

Maske nune’e, mosu pro-kontra maka’as husi partisipantes sira tamba konsidera FNPK ne’e mosu tamba hatudu Governu la tau fi’ar ona ba instituisaun Estadu sira mak oras ne’e iha.

Deputadu Adriano do Nascimento husi bankada Demokratiku (PD) ne’ebe partisipa iha diskusaun ne’e hateten, nia parte apoiu harí FNPK ne’e se wainhira instituisaun Estadu sira fraku duni luta kontra korupsaun, se lae nia parte sei kontra total.

Deputadu Adriano mos kestiona wainhira forum ne’e estabelese se finasiamentu husi Estadu maka nia la konkorda tamba oras ne’e de’it Estadu sei dada i’is hela finansia instituisaun Estadu mak oras ne’e iha.

Direktur Exekutivu ONG Lalenok ba Ema Hotu (LABEH), Christopher Hendry Samson iha nia intervensaun afirma, nia parte konkorda forum ne’e maibe forum ne’e tenki kria espasu di’ak ba povu no nasaun.

Hatan ba kestaun hirak ne’e, VPM Carrascalão esklarese, FNPK ne’e sei hetan finansiamentu husi orsamentu Estadu U$15mil, no FNPK ne’e, sei sai hanesan forum konsultativu ida ne’ebe hetan ideia husi parte hotu, diskuti no liu husi VPM Carrascalao lori ba Konsellu Ministrus.

VPM Carrascalão haforsa liu tan katak, importansia husi FNPK mos atu fo oportunidade ka espasu ba publiku, liliu ba profisional, politikus, akademiku sira atu buka mekanizmu kombate korupsaun.

Iha parte seluk, VPM Carrascalão hatutan, FNPK mos sei fo presaun ba instituisaun Estadu sira atu ho seriu tuir lei ne’ebe iha kombate korupsaun. No forum ne’e mos sei interven ba instituisaun Estadu balun liliu ministeriu sira.

Tuir observasaun Jornalista timorexpose iha fatin sorumutu haktuir katak, maske sorumutu ne’e importante tebes, maibe reprejentante povu iha Parlamentu Nasional sira la marka prezensa so deputadu Adriano de’it, reprejentante Igreija ne’ebe kontra maka’as korupsaun la marka prejensa no konvidadus seluk la fo importansia ba sorumutu ne’e.

VPM Carrascalão lamenta tebes ho augensia konvidadus hirak ne’e. No kondena konvidadus hirak la marka prejensa ne’e la fo importansia atu luta kontra korupsaun iha nasaun Jovem ne’e.

Maske nune’e, sorumutu ne’ebe partisipantes kuaze ema nain 30 ne’e lao ho sussesu, tamba partisipantes sira fo kontribuisaun di’ak tebes iha diskusaun, maske iha partisipantes balun nia intervensaun ho interese grupu no privadu de’it. (TE)
.