. Foto, CJITL

Written by Eva Almeida-Friday, 21 May 2010

CJITL flash, Selebrasaun loron 20 Maiu Timor Leste independensia tinan ida ne’e la hanesan ho tinan seluk no povu barak mak sai hanesan Penonton husi moru sorin Palasiu Prezidenti Republika nian tamba la hetan auturizasaun husi siguransa sira.

Maske loron ida ne’e nu’udar loron Vitoria ba povu aileba iha rai ida ne’e maibe sira nafatin la hetan oprtunidade atu bele hakbesik an hodi asiste direitamente seremonia histriku ne’e.

Saturnino da Costa nudar povu ki’ik senti laran triste tamba hamrik deit iha moru sorin hodi asiste seremonia loron independensia nasaun ne’e.

“20 de Maiu tenkiser halo iha fatin ne’ebe luan para povu hot-hotu partisipa la’os halo para limitadu deit ba ema bo’ot sira povu hamrik iha liur sai penonton hanesan fali festa deputadu ida ninian”, dehan povu aileba ne’e iha Palasiu Prezidenti Aitarak Laran-Dili, Kinta, (20/05) wainhira asiste hela selebrasaun loron 20 Maiu ne’e. “Hamrik iha liur deit la tama ba laran tamba kartaun la iha no la’os konvidadus”.

Nia mos fo kritika ba diskursu Prezidenti Republika Jose Ramos Horta ne’ebe dehan governu no estadu prontu atu hamenus kiak, kanek no mate iha rai ida ne’e maibe nunka tau iha pratika.

“Labele diskursu deit tenki inplementa para povu bele senti ukun an ne’e oinsa”, nia kestiona.

Sorin seluk Joana Ramos (18) nudar joventude senti laran moras ho atetude siguransa iha odamatan palasiu prezidenti nian ne’ebe la fo auturizasaun ba povu bai-bain hodi tama iha Jardim Palasiu atu asiste seremonia ne’ebe refere.

“Hau nudar Joven Feto senti laran moras no triste tanba povu labele partisipa”, dehan Joana. “Seremonia ne’e ba ema bo’ot deit mak hola parte, ami nudar povu ki’ik hamrik iha liur deit sai penonton”.

Nia mos kestiona konaba orariu dada bandeira ne’ebe sedu liu no halo ema barak triste tamba labele asiste tomak lala’ok selebrasaun loron istoriku ne’e.

“Hahu nakukun kedas ne’e duni ami nudar Joven senti ladun furak ba festa povu nian liu-liu iha tinan ida ne’e”, tenik nia. (Eva Almeida/CJITL)
.